يا ربّي يسوع، الإنسان بيعيش كلّ إيّامو ما عم يفهم قدّيش حبّك لإلو كبير، إنت اللي ما خلّيت طريقة تا تعطيه السلام والفرح والسعادة إلّا ما عملتلو ياها، حتّى إنّك أخدت العقاب عنّو، وبعدو بيهينك بتصرُّفاتو وبِبُعدو عنّك.


يا ربّي يسوع، كيف الإنسان ما بيآمن فيك، وإنت اللي كنت وبعدك حاضر معو، عاطيه الحياة والخلاص، وناطرو بقلب سهران عا ولادو، تا يجي لعندك وتشفيه من خطيتو وضعفو وإستهتارو برحمتك.


نحنا ضعاف يا ربّي يسوع، وكلنا إيمان ورجا بإنّك ترحمنا وتخلِّصنا، لأنّك وحدك إلهنا وملكنا ومخلِّصنا، ووين ما رحنا بتبقى حاضر معنا، ولو بالخفية ناطرنا، وشو ما عملنا، بتبقى السند الوحيد اللي ما بيغشّنا، لهيك قد ما نشكرك قليل، ورح تكون مشاركتنا بحمل الصليب معك عربون حبّ وشكر لحبّك اللي ما إلو حدود.

/الخوري يوسف بركات/