يا ربّي يسوع، إنت هوّي الراعي الصالح اللي بذلت، وبعدك عم تبذل، نفسك كرمالنا، نحنا خرافك اللي بتحبّن، بحاجة لإلك لأننا عم نضيّع الطريق، طريق الملكوت، بكتير من الأوقات.


يا ربّي يسوع، إنت البيّ اللي بتزعل إذا ضاع حدا منّا، نحنا ولادك، وبتصير تركض ورانا وبتدعينا، من خلال أشخاص أو مواقف أو حتّى قدّيسين وقدّيسات، تا حتّى نتوب ونرجع لعندك ونعيش معك.


أعطينا يا ربّ ضمير حيّ تا نقدر نشوف خطيئتنا على ضو حبّك، ونتوب ونرجع لعندك، ومنشوفك بأخوتنا وأخواتنا الضعاف، وهيك منكون عم نعيش الفرح والسعادة بالمطرح اللي بتدعينا دايماً إننا نعيش فيه للأبد، واللي هوي قلبك الحنون.

/الخوري يوسف بركات/