يا ربّي يسوع، إنت اللي قلتلنا وشدّدت علينا تا نعرف شو نطلب من الله الآب، ونطلبو بإلحاح، لأنّك بدّك يانا نطلع من ذاننا، من أنانيِّتنا، تا نلتفت صوبك ونركّز عا الله الثالوث وحدو بكل شي منطلبو، وكلنا إيمان ورجا إنّو إذا هوّي لخيرنا أكيد رح بيحقّقلنا ياه.
يا ربّي يسوع، وحدك اللي بتعرف خيرنا أكتر من أنفسنا، ومن دونك ما منقدر نعمل شي، ولا منقدر نتقدّس بعلاقتنا معك، إذا كانت مقتصرة عالمادّيات.
يا ربّي يسوع، طلبنا الوحيد هوّي إننا ننمى فيك أوَّلاً بالحكمة تا نعرف نختار كل شي لخيرنا ونطلبو منَّك، وتانياً بالنعمة تا يقوى إيماننا فيك أكتر وأكتر، وتالتاً بالقامة تا نقدر نخدم أخواتنا وإخوتنا اللي بحاجة للمسة حبّك من خلالنا.
/الخوري يوسف بركات/
