يا ربّي يسوع، كلمتك نور وحياة، وقلوبنا بتختلف نوعيِّتا بحسب لقاءنا فيك وحياتنا معك وثباتنا بالإيمان.
ما بدنا تكون قلوبنا سطحيّة يا ربّ، ما بتحفظ كلمتك، وبتستهتر فيا، ودايماً معرّضة للشيطان إنّو يتملّكا.
ما بدنا تكون قلوبنا متحجّرة، يا ربّ، ما عندا مناعة ولا جذور، بتفرح بكلمتك اللي بتدغدغا، بس ما بتتأمّل فيا ولا بتغذّيها لا بالصلاة ولا بالأسرار.
ما بدنا تكون قلوبنا مخنوقة بالشوك وبهموم الحياة، بتسمع كلمتك وبتحبّا، بس بتفضّل عليها شهوات العالم وكبريا الحياة اللي ما بيثمرو ولا ثمر.
بدنا تكون قلوبنا متل الأرض الطيبة، مفلوحة ومنقّاية من الشوك والحجارة، قلوب نقيّة وصالحة وجاهزة لتضمّ كلامك وتعمل فيه، وتمارس الأسرار بفرح وسلام.
/الخوري يوسف بركات/
