يا ربّي يسوع، قدّيش بعدنا بعاد عن الملكوت، منقضّي كل حياتنا نفتّش عن السعادة، بس المشكلة عند الكتار منّا إنّن عم بيفتشو بالمكان الغلط.
يا ربّي يسوع، إنت الكنز الحقيقي بهالحياة، بس على كلّ واحد وواحدة منّا إننا نجاهد تا نلاقيه، واللي بيعرف يلاقيه، أكيد رح يترك كلّ شي تا يحافظ عليه.
يا ربّي يسوع، ما في أجمل، حتّى ولا أصعب، من التخلّي عن الذَّات، عن الأنانيِّة، بفعل توبة وتغيير، تا تصير حياتنا مطابقة مع مشيئتك، إنت الكنز الغالي.
يا ربّي يسوع، إنت الغني اللي ما فينا نحصل عليه إلّا إذا تخلَّينا عن كلّ شي، ورح نسعى إننا نموت عن إنساننا العتيق، إنسان الأنا، إنسان الحقد والكراهية، إنسان الغضب والبغض، تا نولد فيك وننما بِحُبَّك للأبد.
/الخوري يوسف بركات/
