يا يسوعنا الحبيب، ما منقدر نعبّرلك كفاية عن مدى شكرنا لإلك، إنت اللي بيّنت حبّك لرعيتك، كنيستك، لمن بذلت ذاتك عنها وقدّستا بدمك.
إنت اللي إخترت الرسل تا يتابعو رسالة التبشير بالملكوت، وحطّيت بطرس راعي القطيع ومثال للمحبّة والخدمة والرعاية.
يا ربّي يسوع، قدّيش صعبة هالمهمّة، مهمّة رعاية أبناء وبنات كنيستك، جسدك السرّي.
مش هيّنة عالأساقفة والكهنة يكونو صورة حقيقيّة عنّك، يعيشو التجرّد والوداعة والتواضع والخدمة لأقصى درجة، ولا هينة على الآباء والأمّهات إنّن يبنو عيلة مسيحيّة صادقة فيها الكتير من التشبّه بعيلة الناصرة.
علّمنا يا ربّ، كيف نعيش الإقتداء فيك، والتواصل مع بعضنا البعض بالمحبّة والإحترام اللي عندك، والأهمّ كيف نسامح ونغفر للخاطيين بحقنا، ونكون السند للمحتاجين.
/الخوري يوسف بركات/
