يا ربّي يسوع، منتساءل أوقات إذا نحنا منحبّك حبّ صادق وشفّاف ومن دون مصلحة، متل ما منتساءل إذا بطرس والرسل، قبل القيامة والصعود، كانو يحبّوك بتجرّد.

بطرس لامك وقت قلتلن إنّك رح تتألّم وتموت وتقوم من الموت، ووقع بالتجربة اللي حاول الشيطان يغلبك فيها، وخاب أملو لمّن شافك عالصليب اللي صار رمز القيامة اللي هيي أساس إيماننا.

غريب يا ربّي يسوع، كيف إبليس بيحاول يفوت بأقرب الناس لإلك وبيحاول يزعزع العلاقة فيك، متل ما حاول مع بطرس، ولكن بتبقى وحدك القادر إنّك تلغيه.

ونحنا يا ربّ، نجّينا من ذاتنا لمّن بتاخدنا الأفكار البشريّة بعيد عنّك وبيستهوينا روح العالم.

/الخوري يوسف بركات/