يا ربّي يسوع، قدّيش محبتك كبيرة تجاهنا تا تغفرلنا كل خطايانا قد ما أهنّاك وجرحناك؟ وبمجرد فعل توبة واحد من القلب بتمحي متل الغيم خطايانا وبترجع بتجدّد العلاقة معنا لأنّك ما بتخلف بوعدك إنّك معنا إلى منتهى الدهور.

مين نحنا يا ربّي يسوع تا حتّى نكون شغلك الشاغل؟ كرمالنا صرت إنسان ومتت وقمت وطلعت عالسما تا تحضّرلنا مكان، ورجعت تا تاخدنا مطرح ما إنت.

كيف بيصير هالشي يا يسوع بعد ما ضيّعنا طريق السما؟ بس إنت يا ربّ الطريق والحقّ والحياة، بيكفينا إننا نكون معك إنت يا فردوسنا السماويّ، تعا يا إلهنا وملّي كلّ كياننا من حُبَّك تا ننما للأبد.

/الخوري يوسف بركات/