يا ربّي يسوع، كتار اللي بيلجأو للممارسات البعيدة عن اللقاء معك، وكتار اللي بيفوتو بطقوس وشعائر غريبة، بس تا يعفو ذاتن من الإلتزام بأبسط متطلّبات الإيمان الحقيقي والثابت فيك.
يا ربّي يسوع، قدّام هالموجة من الحركات المعادية لإيماننا، منسأل حالنا نحنا ويننا من عمادنا ومسيحيّتنا؟ هل منآمن حقيقة بدور الله الروح القدس اللي باقي معنا وبيعزّينا وبيشجّعنا وبيقوّينا؟ هل عم نسجد لألله الحقيقي واللا لإله صنم، ما بيزعجنا ومنقدر نسكّتو بكم صلاة وببعض الممارسات الضعيفة؟
يا ربّي يسوع، منتطلّع بنظراتك اللي عم تسألنا عن طريقة عيش مسيحيّتنا وصلواتنا، ومنطلب منّك إنّك توعّينا دايماً تا نتابع المسيرة معك وصوبك يا هدفنا الوحيد.
/الخوري يوسف بركات/
