يا ربّي يسوع، منشكرك لأنّك خصّصتنا لإلك وما خلّيتنا نكون من العالم ومغرياتو، منشكرك لأنّك إخترتنا لإلك تلاميذ وتلميذات، ودعيتنا إننا نعيش معك ولإلك.
يا ربّي يسوع، ما بعرف إذا منقدر نتوافق مع العالم إذا عم بيعيش بعيد عنّك، بس الأكيدين منّو إنّو بعيد عنّك حياتنا عذاب وألم الإنفصال.
يا ربّي يسوع، بإختيارك لإلنا صرنا شهود لإلك بالعالم، ودورنا نحنا كمان إننا نختارك يا إلهنا الحبيب تا تبقى هالشهادة ثابتة فيك وتكون إنت مصدرا وغايتا.
بشهادتنا إلك يا ربّ، وبطريقة عيشنا رح نعرف إذا عم نعيش الشهادة الحقيقيّة، وهيك منكون عم نعيش التلمذة الحقيقيّة إلك، ونخلّي العالم كلّو يعرفك ويحفظ كلمتك ويعمل بمشيئتك، المهم إننا نتمسّك فيك ونعطي ثمار حب بتدوم للأبد.
/الخوري يوسف بركات/
