كلامك واضح يا ربّي يسوع، وتعاليمك بتفوت عالقلب لخير الإنسان، لأنّك بتحبّ الإنسان، كل إنسان.
صحيح كلامك يا ربّ بإنّو النجاسة والدنس ما بيجو بطريقة الأكل، لا بل من نوعيّة القلب ومن النيّة، ومن اللي منضمرو بتفكيرنا، بس الكلام الأحلى لمّن بتدعينا تا تعبّر عن حبّنا إلك من القلب.
يا يسوعي الحبيب، منرفعلك قلوبنا تا تطهّرا، وتنقّيها تا تثمر وتصير متل قلبك وتمتلي منك، ونتّحد فيك ونكون شهود حقيقيّين لإلك.
يا ربّي يسوع، نحنا عارفين ومتأكّدين بإنّو كلمة الحق ما رح يحبّوها اللي ما عندن ياك الملك والإله لأنن ما بيعرفو قيمتا ومفعولا، نوّر عيوننا وقلوبنا تا ما يصدر منّا إلّا الخير تجاهك وتجاه الآخرين.
/الخوري يوسف بركات/
