يا ربّي يسوع، كلامك نور وحياة، هالنور اللي بيضوي عتمة حياتنا اللي عم بتشوّها الخطيّة، وهالحياة اللي عم تروي عطش حياتنا اللي جفّفتو أنانيّاتنا وشهواتنا وطمعنا.
يا ربّي يسوع، شو في أجمل من إننا نشوفك بالمهمّش والمتروك والمتألّم والحزين، ونهتمّ فيه كأننا عم نهتمّ فيك، ونواسيه كأننا عم نبلسم جروحاتك، ونداويه كأننا عم نروي عطشك للحبّ.
ربّي يسوع، إنت نبع الحبّ، ومنّك منرتوي تا نتقدّس ونسقي العالم من حبّك وحنانك وسلامك اللي ما إلن حدود، ومعك بدنا نضلّ عايشن المحبّة تجاه إخوتنا تا نعكس حبّنا الدايم إلك.
/الخوري يوسف بركات/
