يا عناقيد النور اللي عم تشرق بهالصباح عا كروم الدني، وحاملي معا بركات ربّنا علينا، ضلّك طلّي علينا وحطّي بقلوبنا فرح السما اللي ما بينوصف.

يا هالملايكة اللي خصّصكن الله الحنون تا تحمونا من كل شرّ وتجربة، منشدّد عليكن بدعانا تا تبعدو عنا كل نسمة هوا فيها خطيّة بتبعدنا عن الربّ.

يا هالقدّيسين اللي عرفتو كيف تحافظو على الوزنات اللي عطاكن ياها الربّ الإله ، وتاجرتو فيها وربحتو الملكوت، قرارنا وهدفنا نكون متلكن بس عم نضعف قدّام لذّة الخطيّة، تشفّعو فينا.

يا روح الله القدّوس رفيق دربنا ومعزّينا، إنت القائد والربّان لسفينة حياتنا، ملّيها من حبّ ونِعَم الربّ، تا نكمّل مسيرتنا بكلّ أمانة وإخلاص ونحصل عالسما.

/الخوري يوسف بركات/