أجمل ما في بالدني يا ربّ هوي الصباح اللي بيشرق علينا بنورك بعد ليل مظلم، منسبّحك بهالأحد المبارك ومنشكرك على حبّك لكل خليقتك.
إنت وعم تحكينا يا ربّي يسوع عن الوكيل والوكالة، منسأل حالنا: هل نحنا حقيقة منآمن بإنّك إنت اللي وكّلتنا على مين وعلى شو في بحياتنا؟
ممكن نجاوب نعم منآمن، بس بكتير من الأوقات، تصرفاتنا بتعاكس هالجواب، منصير نغض النظر عن وجودك معنا، ونقنع ذاتنا بإنّك مش موجود أو بعيد ما بتشوفنا ولا بتسمعنا، ومنصير نعمل حالنا أسياد، ومنحط الأنا اللي فينا آلهة على ولادك.
علّمنا يا ربّ كيف نكون مسؤولين، بمحبّة، عن إخوتنا اللي وكّلتنا حمايتن من الشرّ والشرّير، ونسهر عا حالنا وعليون تا ما نضيع ونضيّعن معنا ونخسر الملكوت.
/الخوري يوسف بركات/
