قدّيش حلو الصباح معك يا ربّ، إنت اللي، بالرغم من كل الشرور بهالدني بتضلّك تشرق نورك تا تأكّدلنا على عهدك لإلنا إنّك معنا دايماً، منشكرك ومنسبّحك.

ما بعرف يا ربّ قديش بحياتنا عم نتوقّف عند تساؤل مهم عن محور أعمالنا، وكيف عم نعيش حياتنا الروحيّة والإنسانيّة.

والخوف يا ربّ من إننا نكون نحنا حاطّين ذاتنا محور حياتنا وأعمالنا ونعتقد إننا بقوّتنا قادرين إننا نعيش بسلام ونخلّص أنفسنا.

بس إنت يا ربّي يسوع نقطة الثقل ومثالنا بحياتنا، لهيك الحياة بتحلى فيك، ومنلاقي حالنا معك وفيك.

ثبّتنا فيك يا ربّي تا نعرف إنّو الأولويّة هيّي إلك يا يسوع ، إنت اللي علّمتنا إنّو ربح العالم منّو شي قدّام خسارة النفس.

/الخوري يوسف بركات/