منفتح عيوننا، بهالصباح المبارك، عا نورك يا إلهنا الحبيب، ومنشكرك عا هالنهار اللي عم بتجدّد فيه حياتنا.
بهالنهار المبارك، منتذكّر دخولك لأوّل مرّة عالهيكل مع مريم ومار يوسف، وكان ناطرك سمعان الشيخ وحنّة النبيّة تا تجي وتعطي الخلاص للعالم.
ما بعرف إذا نحنا بحالة إنتظار لإلك يا ربّ بحياتنا بسبب ضياعنا، ما بعرف إذا بعدنا منآمن بإنّك حاضر معنا يا ربّ لأنّو أقوالنا وأفعالنا ما عم تعكس هالإيمان، ما بعرف إذا بعدو الرجا فينا واللا يئست قلوبنا بسبب الظلمة بالعالم وتناتش الحصص بين المسؤولين، ما بعرف إذا بعدك يا ربّ الأساس بحياتنا واللا ضيّعناك بين آلهة وزعماء هالدهر.
بس الأكيدين منّو إنّو بدنا ياك مخلّص لحياتنا، رغم كل هالضياع، تعا وفوت عا هيكلنا وقدّس قلوبنا وعقولنا.
/الخوري يوسف بركات/
