منرفعلك يا ربّ بهالأحد الفارح قلوبنا وعقولنا ومنصرخلك أناشيد فرح وتسبيح وتمجيد وشكر عا كل نعمك وعطاياك اللي بتنعم فيها علينا بكل حياتنا.

منتأمّل يا ربّ بصورتك الحلوة ومنتساءل إذا عم نشوفك بكل إخوتك الصغار اللي بيملّو حياتنا بآلامن وأوجاعن وحاجتن للمسة حبّ من جهة، ومن جهة تانية منسأل حالنا إذا نحنا إختبرنا متلن الأوجاع والجراحات وحملناها معك يا يسوع بفعل حبّ وردّ جميل إلك.

يا ربّي يسوع، منحزن عا كل الفرص اللي قطعت تا نلتقي فيك وما إلتقينا، بدنا نغوص أكتر بجوهرك بدل ما نلتهي بالقشور.

يا يسوع، شيلنا من قيود الأنانية، وخلّينا ننطلق صوب كل سجين بقيودو، ونحمّلو حبّك وسلامك وفرحك.

/الخوري يوسف بركات/