رغم الزلازل والهزّات اللي عم تلحق فينا وبطبيعتنا، بيشرق نورك يا ربّ تا يعطينا أمل جديد بحياة مليانة فرح وسلام فيك.
يا ربّي يسوع، من أهمّ الأسئلة اللي منطرحا بحياتنا، نحنا البشر، هوّي عن الموت والقيامة ولحظة المجيء الثاني، وعن مصير الموتى.
وهالقيامة، اللي رح بتصير بموعد ما حدا بيعرفو ولا ناطرو، منها إلّا حدث واقعي ومرحلة عبور من هالحياة الفانية وما فيها من صعوبات ومغريات، لعالم مليان سلام وفرح أبديّ.
والقيامة يا ربّي يسوع بتبقى حدث إلهيّ وسرّ، هيّي الإنتصار العظيم اللي حقّقتلنا ياه بموتك عالصليب وقيامتك من بين الأموات.
تعا يا ربّ وشيلنا من خطايانا ومرضنا الروحي اللي عم ياكل من حياتنا ويهدّد مصيرنا الأبديّ معك.
/الخوري يوسف بركات/
