بنهاية هالأسبوع الأوّل من الصوم، منرفعلك يا ربّ كل التسبيح والمجد والإكرام والشكر على حبّك العظيم واللي ما إلو حدود.
يا ربّي يسوع، الصوم مش عواطف لا بل حياة بتنعاش بالتواضع والمحبّة، بالصوم منلتفت صوبك بتوبة صادقة وبإعتراف كامل بإننا ما منقدر نخلّص حالنا من دون ما نسلّمك ياها.
يا ربّي يسوع، إنت اللي بترسلنا دايماً لكرمك تا نكون عمّال صالحين نحمل محبّتك ونورك منّك لإخوتنا.
منعرفك يا ربّي ما بتطيق الكبريا، ومنسأل حالنا إذا عم نجي لعندك تا نتبرّر ونتقدّس، واللا تا نتكبّر وندين غيرنا؟
علّمنا يا ربّ كيف نوقف قدّام ذاتنا تايبين، ونطلب منّك الرحمة والغفران تا تغمرنا بنعمتك اللي بتحيينا بحبّك الأبدي.
/الخوري يوسف بركات/
