بصباح هالنهار المبارك، عيوننا وأفكارنا وقلوبنا بتلتفت صوبك تا ترفعلك المجد والإكرام وتشكرك.

بحضورك يا ربّ بتزول كل الحواجز اللي بتمنعنا إننا نتقدّس، وبالصوم منصير نتقوّى روحيًّا، وبالتواصل معك يا ربّ منوصل لمرحلة النضوج، وبالمحبّة الأخويّة منوصل للحياة فيك، وشو في أجمل من هالحضور اللي بيعطينا الفرح الحقيقي؟

يا ربّي يسوع، ما بدنا نكون متل التينة اليابسة، بكرمك، ما منعطي ثمار، وقدّام كل خطأ منصير نحط أعذار، ما فينا نعيش بدوّامة الوعود المزيّفة وما نطبّقا بحياتنا.

يا ربّي يسوع، بدنا تقويلنا إيماننا فيك تا نقدر ننقل الجبال اللي بتمنعنا من إننا نعيش معك، ونطرحا ببحر الموت تا تصير طريقنا صوبك آمنة.

/الخوري يوسف بركات/