الصباح إلك ، وكل الأوقات بتحلى وبتتنوّر بنورك يا ربّ السما والأرض، منرفعلك كل التسبيح والمجد والإكرام.
يا ربّي يسوع، منشكرك لأنّك جيت عا أرضنا وتجسّدت وصرت إنسان متلنا تا تشفي البشريّة كلّا، ومن بعد ما شفيت الناس بواقعن اليومي وبعلاقاتن مع الكون ومع إخوتن ومع ذواتن، بقيو معك وصارو جوعانين لإلك.
عظيم إنت يا ربّي يسوع لأنّك أخدت اللي بالإنسان وسكبت فيه اللي إلك ، أخدت حياتو وسكبت فيها حياتك تا تحييهن من جديد، وتحميهن من الشيطان وتجاربو المميتة.
يا إلهي الحبيب، منشكرك على نعمة الإفخارستيّا اللي عطيتنا ياها على مدى التاريخ، أعطينا ذاتك اليوم وكل يوم تا نعيشك ونقدّمك لكل اللي منلتقي فيون، ونجيبن لعندك إنت مصدر وغاية الحياة اللي عم نعيشا.
/الخوري يوسف بركات/
