منرفعلك يا رب، كل التسبيح والمجد بهالصباح المبارك، ومنشكرك عا كل لحظة عم بتكون معنا فيها، هيدي أهم وأحلى أعجوبة بالإضافة للحياة.

يا ربّي يسوع، بكتير من الأوقات منحسّ بإننا عايشين بالظلمة، والعتمة عم بتلفّنا بقلب التجارب وعواصف الحياة اليوميّة، ومنصير نحسّ بإننا متروكين.

وبقلب هالعواصف إنت موجود يا ربّي يسوع، سهران علينا ومش تاركنا، ولمّن منتعب ومنلكّ، وحدك اللي بتجي وبتخلّصنا، وفيك مننتصر عا أمواج الموت.

هيدي هيّي القيامة من الموت الأبديّ يا رب، وهدفا الحبّ الحقيقي المليان تضحية وبذل ذات.

شدّدنا يا ربّي يسوع فيك أكتر وأكتر، وكون قائد سفينة حياتنا وساعتا أكيد رح نوصل بأمان.

/الخوري يوسف بركات/