ما أعظمك يا الله، بكل يوم وبكل صباح، نورك بيملّيلنا نهارنا تا نتبارك فيك وتكون أوقاتنا مليانة سلام، منشكرك على حضورك الدايم معنا.
يا ربّي يسوع، كتير أوقات منعيش الحكم عالآخرين، ومناخد من ذاتنا مقياس للعالم، ومنصير نميّز اللي متلنا هنّي الصح واللي مختلفين عنّا هنّي الغلط.
يا ربّي يسوع، كتير من الأوقات منجهل أو منتجاهل منطقك بالإنجيل، منصير نعيش منطقنا، ومنحرّف تعاليمك على حسب أهدافنا وأهواءنا.
يا ربّي يسوع، كتير من الأوقات منصير نشهد لذواتنا ومش لإلك، مننتفخ ومنصير متل السنبلة الرافعة راسا بس مش عارفة إنّها فارغة.
وكمان يا ربّي يسوع، إنت بتعرف شو في بقلوبنا، وبتعرف إننا منحبّك، وبدنا ياك إنت الأساس بحياتنا، علّمنا كيف نكون متل السنبلة المليانة، ننحني قدّام محبّتك وألوهيتك تا نعرف نعطي ثمار تفرّحك وتفرّحنا.
/الخوري يوسف بركات/
