منرفعلك كل المجد وكل التسبيح وكل الشكر يا إلهنا الحبيب، بهالصباح المليان حب وفرح وسلام من نورك.
يا ربّي يسوع، منشكرك لأنّك علّمتنا درس كتير مهم وهوّي إنّو ما نخلّي شي يمنعنا عن الهدف، إنت اللي كان هدفك فداء البشريّة، وصلت للهدف وتمّمت حبّك لإلها بموتك عالصليب كرمالا وقيامتك من بين الأموات حبًّا فيها.
عظيم إنت يا ربّي يسوع، أخليت ذاتك وتبهدلت كرمالنا، وكانو عيونك دايماً متوجهين صوب الله الآب، بينما عيون اليهود ما كانت عم بتشوف مجدك، كانت مسحورة بإغراءات السلطة والطمع والأنانيّة، ونسيو الأقوال والأفعال الإلهيّة اللي كنت تحكيهن وتعملن.
ونحنا يا ربّ، كتير منضعف قدّام التجربة، ومنلتفت صوب اليأس وبيغيب عنّا الهدف، ومنفقد معنى رسالتنا.
ثبّتنا بإيماننا وبحبّك وحبّ إخوتنا تا نبقى معك وإلك.
/الخوري يوسف بركات/
