طلع النهار علينا يا ربّ بصباح مليان نعم وعطايا، وفيه منقدّملك نهاية صيامنا تا نفوت معك عا أسبوع الآلام ممتليين من الروح القدس.

يا ربّي يسوع، كتير منضيع بحياتنا بين التجربة والخطيّة، ومننسى إنّو التجربة هيّي الخطيّة لمّن منقبلا، ولابدّ إننا نتجرّب من الشيطان اللي بدّو يحاول يبعدنا عنّك، بس كلنا إيمان إنّك حاضر تا تنجّينا لمَّن مندعيك.

يا ربّي يسوع، اإت اللي بقيت عينك عا الله الآب كل الوقت اللي كان عم بيجربك فيه الشرير، حوّلت التجربة لمناسبة تا تفوت معو بعمق ما إلو حدود.

إنت اللي غسلت خطايانا بدمك عالصليب وعطيتنا الحياة.

نجّينا يا ربّ من التجارب، وإزرعنا بحبّك تا تصير التجربة وسيلة للهروب لحضن حبّك الإلهيّ.

/الخوري يوسف بركات/