منسبّحك يا ربّ ومنمجّدك ومنباركك عا هالأسبوع المبارك اللي فيه عم نتأمّل بمراحل الآلام اللي عشتا كرمالنا، واللي من خلالا عطيتنا الخلاص.
يا ربّي يسوع، انزعج رؤسا الكهنة لأنّك عم تعمل أعمال الله، وقرروا إنّن يقتلوك تا يخلصو هيكلن ومدينتن من الرومان، هني اللي استولوا عالشريعة تا تصير وسيلة يفرضو فيها سيطرتن عالشعب وعالهيكل.
بينما إنت يا ربّي يسوع، حوّلت، بحبّك، خطيّة العالم لدرب خلاص للإنسان، وعمل فداء للبشريّة اللي عم تتخبّط وتتوحّل بوحل الأنانيّة.
يا ربّي يسوع، اعطينا النعمة على إننا نوعى على حقيقة خطايانا وخطورتا، ونبتعد عنها تا نقدر نتهيّأ، بموتنا عن ذاتنا القديمة وعن العالم، إننا نقوم فيك ومعك، لأنّك إنت الحبّ الصافي .
/الخوري يوسف بركات/
