طلع علينا الصباح بعد سهرة حلوة وعميقة معك بالقربان يا ربّ، منشكرك ومنسبّحك عا حضورك العظيم معنا يا إله السما والأرض.
اليوم منتذكّر آلامك اللي تألّمتا كرمالنا يا ربّي يسوع، إنت اللي حبّيتنا حبّ ما بينوصف لدرجة إنّك قدّمت ذاتك ذبيحة عنَّا تا تخلّصنا من الموت الأبديّ.
يا ربّي يسوع، إنت اللي صرت إنسان تا تفتدينا وتخلّصنا، إنت اللي حبّيتنا حتّى الموت عالصليب اللي عليه بنيت عهد المصالحة بين الأرض والسما.
بآلامك يا سيّدنا يسوع المسيح، خلّصتنا، وصيّرتنا إخوة وأولاد لبيّك السماوي بعد ما كنّا ولاد الخطيّة الأولي، خطيّة أنانيّتنا وكبرياءنا وعبيد لسلطان الظلمة.
بذكرى آلامك منهتفلك يا ربّي يسوع ومنسألك إننا نتألّم معك بالصبر على كل المحن اللي بتعترضنا بهالحياة الفانية ومتاعبا، ونقوم معك بالمجد للأبد.
/الخوري يوسف بركات/
