يا ربّي يسوع، إلهنا القائم من بين الأموات، بهالصباح المبارك، منتأمّل بحبّك الكبير لإلنا، وقد ما قسيت علينا هالحياة، بصعوباتا وآلاما، إيماننا فيك ما بيتزحزح، لا بل بيزيح حجر الظلمة عن باب قبرنا.
معك يا ربّي يسوع، قلوبنا وأفكارنا وعقولنا تحرّرت فيك وبقيامتك من ظلمة وموت الخطيّة، وصار القبر باب العبور للحياة بالإيمان فيك، لأنّك إنت اللي فتحتو بقيامتك، وبحبّك فضّيتو من الموت الأبديّ.
ونحنا يا ربّي يسوع، بظل هالظلام القاسي اللي عم بيلفّنا، تعا وشيل عن باب قبرنا حجر اليأس التقيل، تا حتّى تصير آلامنا وتعبنا معبر الحبّ لعندك.
بقيامتك المجيدة يا ربّي يسوع، قوّمنا معك بقوّة حبّك ونعمتك للحياة، إنت إلهنا المنتصر فينا عالموت.
/الخوري يوسف بركات/
