أجمل ما في الصباح هوّي النور اللي بتشرقو علينا يا ربّ، إنت اللي عطيتنا الحياة وملّيتنا من حبّك وحنانك، منسبّحك ومنمجّدك ومنشكرك.

منوقف قدّامك اليوم يا ربّ وقدام ذاتنا بكل تواضع، تا نفحص ضميرنا ونشوف نحنا وين صرنا بعلاقتنا معك وبتواصلنا مع الآخرين.

ليش يا ربّ منضل حاطّين حالنا محلّك، ومنصير ندين غيرنا بسبب خطأ عملو ونحنا بذاتنا منكون مجبولين بالخطيّة ومنتحاشى إننا نحكيك عن خطايانا أو نطلب مساعدتك تا نتخطّى الخطيّة بكلّ أشكالا.

ساعدنا يا ربّ على إننا ما ندين الآخرين ونتذكّر إننا نحنا كلنا مش كاملين، ونجّينا من الدينونة العظيمة بعد ما نترك هالدني الزايلة، واعطينا إننا نساعد أخوتنا على إنن يتخلّصو من خطايهن تا نسهر على قداستن ونمشي سوا ومعك درب السما طلوع.

/الخوري يوسف بركات/