صباحك يا رب مليان أمل بمستقبل جديد.
وبهالصباح بتأمّل بكلامك اللي بتقولو لمرتا وبتنبّها تا تعرف تنقّي المطلوب منها.
وشو هوي اللي بتطلبو منّي يا ربّ، أنا اللي عم كون مرتا ببعض الأحيان، بهتم بالقشور وبنسى الأساس، بفضّل الأعمال على إنّي اقعد معك وتحكيني وإحكيك، وسلّمك حياتي.
شو هوي اللي بتطلبو مني يا ربّ، أنا اللي عم كون مريم ببعض الأوقات، بلتهي بالصلوات المتكرّرة وبالكتاب وبالتفاسير وناسي خيي الإنسان اللي بحاجة لإلي.
بحياتي معك، عم حاول يا ربّ أعمل بحسب مشيئتك، إني أقعد عند إجريك قدّام القربان وإسمعك عم بتوشوشني وتقلّي بحبك، وعم تدعيني تا بادلك حبي لإلك وترجمو بأفعالي وأقوالي اللي بسعى على إنها تليق بتمجيد إسمك.
/الخوري يوسف بركات/
