اليوم بهالصباح المبارك، بشوفك يا رب من خلال كلماتك، عم بتوعّيني عا أهمّية الطلب.
كتير من الإيام والأوقات بطلب منّك إشيا منّي بحاجة لإلها أو منها لخيري، ميشان هيك، بعد ما أحصل عليا بضل تعيس وبحسّ إنّو هالطلب ما فرّحلي قلبي.
اللي بيفرّحني بحياتي يا ربّ هوّي إنّي كون معك، بعيد عن ملذّات هالحياة، بعيد عن الأنانيّة، بعيد عن الحقد، بعيد عن الكراهية، بعيد عن كل شي بيعطيني لذة مؤقّتة.
يا إلهي الحبيب، إنت بيّي وبتعرف شو حاجتي وشو بيفرّحني.
طلبي الوحيد منّك هوّي انّي ضلّ عم إزرع فرحك وحبّك بين الناس اللي بزورن او بلتقي فيون.
طلبي يا ربّ إنّك تضلّ ماسكني تا ضل ماشي معك عا أمواج بحر هالعالم وتقلّباتو.
فرحي يا ربّ إنّك تكون راضي عنّي.
/الخوري يوسف بركات/
