مع إشراقة نور الصباح بستنير بكلامك يا ربّ.
بهالصباح بشوفك عم بتوعّيني بكلام قاسي تا ما كون متل الفريسيين والكتبة اللي كلّ همّن نفسن.
عم تنبّهني تا ما التهي متل الفريسي بالقشور اللي هيي مهمة أوقات، بس في الأهمّ.
عم تنبّهني إنو ما تكون حياتي المسيحية مقتصرة بس عالأمور الماديّة، وإنما الأهم هوي إنّي إلتفت لأعمال المحبة والرحمة.
مهم إني إسخا بمشاريع إجتماعية، بس كتير من الأوقات بنسى الأهم اللي هيّي الوقفة حد الإنسان التعبان أو اليئسان أو المحتاج للمسة حنان بهالحياة.
مهم إني ساعد بإعمار مباني، بس كتير أوقات بنسى الأهم اللي هوّي إني ساعد ببناء الإنسان المجروح والمتروك والمتالّم.
مهم إني قول إني مسيحي وجاهر بإيماني بالعالي، بس أوقات كتير بنسى الأهم وهوّي إني عيش مسيحيتي بحسب تعاليمك يا ربّ.
هدفي يا ربّ إنّي كون عم حقّق رغبة قلبك.
/الخوري يوسف بركات/
