بصبّحك يا ربّ، مع القدّيسة بربارة، صباح مليان ثبات وشهادة حتى الاستشهاد.
مع هالقدّيسة الشهيدة، بربارة، اللي عرفت تختارك رغم كل الترغيبات، من مال وجاه، او حتى من الترهيبات من ضرب وأضطهادات، بختارك يا رب ملكي والهي الحبيب.
مع هالقديسة الشهيدة بربارة، اللي لقيت فيك الأمان والسلام والفرح اللي ما عطاها ياها لا انسان ولا اله من الآلهة الوثن اللي كانو اهلا يعبدوهن، بلاقي فيك يا ربّ سلامي وفرحي.
مع هالقديسة الشهيدة بربارة، اللي ما تخلّت عنّك مهما طال عذابا وداب جسما، رح ضل حاول وجاهد انّي ما اتخلّى عنّك قد ما قسيت عليي الإيام واشتدّت صعوبات الحياة.
يا الهي الحبيب، ما بقدر اثبت فيك، ولا عيش القرب منك، ولا بقدر كون رسولك اذا ما سلّمت حالي بين ايدين الروح القدس تا اقدر اثبت فيك واتخطى ضعفي وكون عم بنشر هالسلام والفرح اللي بتزرعن فيي.
/الخوري يوسف بركات/
