صباح الحنان هوي صباحي معك يا ربّ بهالأحد المبارك.
يا ربّ انت اللي تحنّنت عا شعبك وبعتلنا إبنك ربنا وإلهنا يسوع المسيح تا يخلصنا من عبودية الخطية اللي عم بتحاول تتحكّم بحياتنا.
وعلّمتنا بالرب يسوع كيف نعيش هالحنان مع بعضنا البعض وكيف نتشبّه بالاله اللي إجا وعاش بيناتنا كإنسان وإله.
منتأمّل اليوم بزكريا الكاهن الشيخ اللي فرحتو وصلت للسما وانطلق لسانو بتسبيحك بعد ما تحقق وعدك لإلو وخلق إبنو، يوحنا، السابق لمجيء الرب.
منتأمّل اليوم بأليصابات الختيارة اللي كانت عاقر وصارت إم لآخر الأنبياء ، شو كانت مبسوطة إنّها حقّقت وصيتك إنّو تسمّي الصبي يوحنا رغم رفض الأقارب.
بتأمّل بالعدرا مريم قدّيشا فرحانة بولادة هالصبي اللي إجا من بعد زمن طويل وعقر، ومبسوطة أكتر لأنو عم يقترب يوم ولادة إبنا يسوع المسيح المخلّص.
ونحنا يا رب، حلو نعيش فرح إنتظار ولادتك بالجسد نحنا وعم نشارك إخوتنا حاجاتن الروحية والإنسانية.
/الخوري يوسف بركات/
