صباحي معك اليوم يا ربّ هوي صباح المغفرة الحقيقية.
قديشك رحوم يا ربّ تا رحمت المرأة الخاطية وحتى الفريسيين والكتبة اللي كان همّن الوحيد إنّن يتشكّو عليا ويرجموها ويسجنوها بسجن أعمالا ولا حتى تركو مجال لرحمة الله.
قديشك يا رب غفور تا غفرت للخاطية خطيتا ودعيتا تا تغيّر الطريق اللي كانت ماشية فيه.
قديشك يا ربّ حنون تا دافعت عن الضعيف قدام اللي بيحاول ينهش فيه بس يوقع.
هيك إنت معنا يا ربّ، بتحبّنا لدرجة ما إلها حدود حتى وصل فيك حبّك إنّك سامحتنا عن كل خطايانا، نحنا اللي جرحناك وبعدنا عم نجرحك ونهينك بأنانيتنا وبخطايانا.
قدّيش ما عم نعرف قيمتك بحياتنا، وقيمة حبّك لإلنا اللي ما إلو حدود والمليان رحمة ومغفرة.
بهالنهار المبارك، رح نحاول نسلّمك، بكل أمانة، قلوبنا المتحجّرة تجاه غيرنا، تا تملّيها من رحمتك وتكون مستعدّة تستقبلك تا تولد وتسكن فيها للأبد.
/الخوري يوسف بركات/
