بصبّحك وبمجّدك، يا اله السما والأرض.
بصبّحك وبمجّدك وبشكرك عا كل نعمك وعطاياك اللي بتفيضا علينا بهالنهار المبارك.
مع الشهدا الموارنة الـ ٣٥٠ تلاميذ مار مارون بعلن إنك الإله الأوحد المالك عا حياتي.
ومع تلاميذ مار مارون، اللي بشهادتن بنيوا الكنيسة بدمن تا تنما بحبك يا ربّ، بقلّك يا ربّ حياتي الك.
مع هالتلاميذ الكتار اللي تربّو وربّوا عائلاتن عا الحياة معك، بعلن إيماني فيك ورجائي إنّك تعترف فيي كتلميذك.
اعطيني يا ربّ، الثبات بالايمان فيك، متل ما ثبتو الـ ٣٥٠ شهيد بإيمانن وواجهو الموت حبًّا فيك.
على مثال هالرهبان الشهدا رح حاول جدد علاقة الحب معك يا رب، وإختلي فيك، وأقعد معك، وإسمع لهمساتك، وإتأمل بإرشاداتك إلي، وآخد فيا تا أقدر عيشك بين العالم.
/الخوري يوسف بركات/
