صباح الفرح والسلام والمحبة، هيدا صباحك يا رب.
كل ما بتعمّق فيك يا ربّ، كل ما بتأكّد إنّو الطريق للملكوت ما فيني إمشيه من دون ما كون متواضع.
والدليل إنّك بكل كلامك بتدعيني فيه للتواضع.
واليوم بالذات عم بتقلي تا ما عيش التكبّر اللي بيبعّدني عنك وعن خيي الانسان.
عم بتقلّي إنّك وحدك ربّي ومعلّمي وإلهي وكل المراكز الأرضيّة منّا دايمة.
عم بتوعّيني على حقيقة الخدمة الممزوجة بحبّك اللي هوّي أكبر درس إلي.
اليوم وكل يوم رح ضلّ إرفعلك التسبيح والشكر عا كل عطاياك اللي بتفيضا عليي، ورح ضلّ إسعى تا كون عم بعرف إمشي بطريق القداسة المليانة شوك الأنانية، شوك الكبريا، شوك التسلط وحب الذات، وأنا كلني إيمان إنّو بإتّكالي وتسليمي ذاتي للروح القدوس رح أقدر إتخطى هالأشواك تا أوصل لعندك للفرح الأبدي.
/الخوري يوسف بركات/
