بصبحك يا رب وبشكرك بهالأحد المبارك، بهاليوم اللي فيه عم تدعيني وتدعي الناس للقاء الحبّ بيننا وبينك، اللقاء اللي بتعطيني فيه جسدك ودمك عربون الإتحاد فيك.
بهالنهار المميّز عم تدعيني فيه يا رب تا ضل ثابت فيك وما خلي حدا أو شي يزعزعلي إيماني فيك.
بشوفك من خلال هالاخرس _الأعمى عم تدعيني إني أطلع من العمى اللي عم بتحاول تسبّبلي ياه الخطية وشوف العالم بعينيك.
بشوفك من خلال هالاخرس _الأعمى عم تدعيني إنّي إتحدى خرس الجهل اللي بيصير يلهيني عن إنّي إعلن حقيقتك بين العالم.
بهالأحد المبارك يا ربّ، بعلن إيماني فيك وبوضع حالي بين إيديك تا إنتي تشفيني من ضياعي وتنوّرلي طريق السما تا أقدر إسلكا بفرح أنا وعم أعلن عجايبك بحياتي، رغم صعوبتا.
/الخوري يوسف بركات/
