صبحية مع الرب

صباحي اليوم ببتدي فيه بتسبيحك وتمجيدك يا رب السما والارض.

يا يسوعي الحبيب، انت اللي بتريد الرحمة فوق كل شي، عم بتعلّمنا، من خلال حدث الشفاء السبت وتشاور الفريسيين عليك تا يتهموك، كيف نسامح اول شي، وتاني شي ما نحكم عالناس وندينن.

ما عدنا نعرف يا ربّ اذا الصوم هوي زمن ومناسبة للتسامح والرحمة والخلاص واللا زمن للادانة والحكم عالغير.

ما عدنا نعرف انو اذا بصومنا قلوبنا بتتنقّى تا تلتقي فيك واللا عم تتحجّر بالاكتفاء الذاتي والتشاوف.

ما عدنا نعرف اذا صلاتنا عم بتكون لقاء حبّ وتعلّق فيك واللا صارت تجارة معك وتبرير اخطاءنا.

يا ربّ، انت اللي جعلتنا محور اهتمامك وحبيتنا من دون مقابل، ساعدنا تا نرفض كل منطق الادانة ونركّز عا تحرير نفوسنا والآخرين من كل عبوديّة للخطية، تا تصير المحبّة تجسيد لايماننا فيك.


/الخوري يوسف بركات/