صبحية مع الرب

صباح الطمأنينة والسكينة هوي صباحي معك يا ربّ.

بهالزمن الصعب، رياح بحر العالم عم تواجه حياتنا معك وبقوّة، وانت يا ربّ عاليابسة، ببرّ الأمان، ساهر علينا وعا رسالتنا بهالعالم.

ونحنا كلنا ثقة انّو وقت اللي بتشوف العواصف والإضطهادات والصعاب عم تشتدّ علينا، رح بتكون حدنا وعم بتنجّينا من قوّة الظلام الحاضر تا يلفّنا.

يا يسوع، إنت اللي غلبت الموت، ومشيت عالميّ قدام تلاميذك وسبقتن لمطرح ما بدّن يوصلو، تا تقلّن وتقلّنا إنّك دايماً سابقنا ومحضّرلنا المكان وما علينا إلاّ إننا نآمن فيك وبقدرتك على تسكين رياح الشرّ اللي بتحاول تغرّقنا ببحر الخطية.

يا يسوع، إنت اللي غلبت عالم الظلمة، كلنا ثقة فيك بإنّك عم بتكون حدّنا تا نشفى من إنساننا العتيق ونقدر نعبر معك لضفّة النّعمة والرحمة والسلام، ضفّة المحبّة الصافية المليانة من روحك.


/الخوري يوسف بركات/