صبحية مع الرب

بهالصباح المبارك، اللي فيه عم تنعم علينا بخيراتك، بسبّحك يا إله الرحمة.

يا ربّ نحنا ولادك، ومنعرف قدّيشك حنون وعم تحاكينا بكل الوسايل، بس عجقة وهموم هالحياة، وخاصة بهالفترة الصعبة اللي عم نمرق فيا، عم تمنعنا إننا نقدر نصغي لكلامك.

فا نحنا بحاجة ماسة لإلك أكتر وأكتر تا نسمعك وتسكب فينا روحك القدوس تا يعطينا القوة ويفسّرلنا كل شي عم بيصير معنا ونعرف أكتر وأكتر كيف نشهد لإلك ولقيامتك بحياتنا رغم كل اليأس اللي عم بيحاول يلفّنا ويبعدنا عن الرجا بإيام جديدة وحلوة معك.

يا ربّي يسوع، بدنا ياك تبقى معنا تا نقدر نكون مستعدّين لنواجه كل الصعوبات اللي بتحاول تعترض مشروعك بحياتنا، ونعبر معك صوب الآخر ونشهد لإلك بيوميات حياتنا تا نستقر فيك وقت اللي بتدعينا.


/الخوري يوسف بركات/