صبحية مع الرب

مين بيقدر يحكي متل ما إنت بتحكي يا ربّ إلّا اللي عندو السلطان على يللي بيقولو؟

وإنت يا ربّ بسلطانك قدرت آنّك تحرّر الإنسان من الشريعة اللي تقيّد فيا وخلّتو عبد للحرف بدل ما تكون جسر عبور مباشر لعندك.

واللي خلّا الشعب بحالة ضياع هنّي الفرّيسيين اللي تسلّطو عالشريعة وركّزو عالظاهر وأهملو المضمون وهيدي هيي الخيانة الحقيقية للأمانة اللي وكّلتن فيا، وصارو يعيشو الإستغلال لهلأمانة وبالمقابل بيدّعيو القداسة.

ونحنا يا ربّ، بحياتنا اللي عم نعيشا، عم نتعرّض للإزدواجية وللكذب ولخيانة رسالتنا معك.

ساعدنا تا حتى نبقى بحالة فحص ضمير دايمة، وما تحيد قلوبنا ولا عيوننا عنّك، ونتأكّد إننا بهالدني زوّار، ونتعلّم نروح صوبك إنت الهدف، ونسهر على إنّو تكون قلوبنا نقيّة، وأعمالنا وأقوالنا بتليق فيك وبحبّك.


/الخوري يوسف بركات/