صبحية مع الرب

ما في احلى من الصباح اللي بيبلش بنور قيامتك يا ربّي يسوع الحبيب.

دايما الصيد معك يا رب بيكون مليان لانك بتبقى الاساس الحاضر بكل عمل منقوم فيه وهدفو تمجيد اسمك.

يا ربّ، كلنا ايمان انك ناطرنا على شاطى الأمان، عم تتطلع فينا بعيونك المليانة حبّ صادق وصافي، وعم تدعينا تا نجي لعندك انت الرب القايم من الموت والاله اللي غلبت الشرّ بتواضعك وبحبّك الكبير وبغفرانك اللي ما الو حدود.

يا ربّ، منشكرك لأنك عم بتساعدنا وبتحمينا من امواج بحر هالعالم المادي اللي عم بتحاول تغرقنا بالخطية وتبعدنا عنك.

نحنا جايين لعندك يا ربّ، متل بطرس والرسل، تا نعلن حبنا لالك وتعلّقنا فيك وانتماءنا لمسيرتك، مسيرة الفرح والسلام والمحبة والرجا بظل كل الظروف الصعبة اللي عايشين فيا.


/الخوري يوسف بركات/