صبحية مع الرب

بصباح هالنهار المبارك، منسبّحك ومنمجدك يا رب مع القدّيس جرجس شهيد الإيمان فيك.

مع القديس الشهيد جرجس، اللي عاش بحسب تعاليمك وبقي ثابت بحبّو لالك مهما علي مركزو، منقلّك يا ربّ إنّك إنت وحدك الثابت والباقي كلّو زايل.

مع القديس الشهيد جرجس، اللي حبّك لدرجة الإستشهاد ، منقلّك يا ربّ إنّو لإلك وحدك بتليق الشهادة المليانة حب وتسامح ومغفرة.

مع القديس الشهيد جرجس، اللي تحمّل كلّ العذابات تا يحمل عنّك ولو شوي صليبك ويشاركك بآلامك، منمجّدك يا ربّ ومنقلّك إنّك وحدك الحامل ضعفنا ووحدك مشجّعنا بوقت الشدّة والتجارب.

مع القدّيس الشهيد جرجس، اللي ربّوه أهلو على إيمان ثابت وهوي إنو وحدو جسدك هوي خبز الحياة وإنّو دمّك هوي غافر الخطايا، منعظمك ومنباركك يا ربّ ومنقلّك اننا نحنا كمان عم نسعى إننا نثبت فيك للأبد.


/الخوري يوسف بركات/