صباح المحبة والحنان هوي صباحك يا رب.
بهالنهار المبارك، بتأمل بهالإنسانة المنحنية وراسا عا شوي بيلامس الأرض، وبعدن اليهود بيوصفوها بالخاطية وضارِبا الشيطان وما عاد فيها تقوّم ضهرا.
نسيو إنّو الإنسان ممكن يمرض.
ما خطر عبالن إنّو ممكن من تعب السنين وشقا الحياة صار فيها هيك.
أو ممكن الحزن عا حدا عزيز عليا خلاها تستسلم لتعب الجسد.
اوقات كتير يا ربّ منحكم عالناس من أوّل نظرة ومنصير نوصف فيهن بطرق مختلفة.
أوقات كتير يا رب بيصير بدنا نقولب الناس متل ما بدنا وما منقبلن متل ما هنّي.
اليوم بشكرك لأنّك عم بتوعّيني إنّو كل إنسان بلتقي فيه هوي إبنك أو بنتك ورح حاول شوفك فيه وعاملو متل كأنّي عم عاملك.
/الخوري يوسف بركات/
