صبحية مع الرب
صباح المحبّة والمغفرة هوي صباحي معك اليوم يا ربّي يسوع.
لمّن سألك بطرس الرسول عن المسامحة، وكان مفكّر انّو السبع مرات مغفرة هنّي شي عظيم وكافيين، تقلّق بجوابك اللي بيدعي للمغفرة من دون حدود.صعب يا ربّ الغفران مرّة ومرّتين بمنطقنا البشري، تا كيف اللي عم تطلبو يا ربّ الغفران اللي ما الو حدود؟
صعب يا ربّ الغغران اللي عم تطلبو منّا، بس انت قلتلنا انّو الحياة معك مش هيّنة، فيها حمل صليب.
بس خلف هالحياة وهالصليب في الفرح الأبدي.
وشو حلو لمّن منغفر للآخرين لأنّو الغفران هوّي الطريق صوبك يا ربّ وفيه منكون نورك بالعالم.
واذا ما عرفنا وما قبلنا نغفر للآخرين من كل قلبنا، رح نحرم حالنا من الحياة الأبدية معك.
مش هيّن اللي عم تطلبو من بطرس ومنّا، يا ربّ، بس معك ما في شي مستحيل وخاصة لمّن منسلّمك ذاتنا، تا تزرع بقلوبنا الفرح والسلام نحنا وعم نغفر.
/الخوري يوسف بركات/
