صبحية مع الرب

لعازر مات يا ربّ وانت اكّدت لإخواتو مرتا ومريم انّو نايم ومش ميت. لأنّو معك صار الموت معبر للحياة الابدية وبطّل يكون نهاية.

ولأنّك انت يا ربّ نبع الحياة اللي بتتدفق علينا، كلّنا ايمان بإنّنا رح نقطع هالوادي المعتّم بالخطية للحياة الأبدية معك.

لهيك كلنا ايمان ورجا انّك انت الهدف، يا ربّ، واننا رح نموت مع لعازر عن خطيّتنا تا نقوم ونحصل عالحياة الدايمة معك لانّك انت القيامة والحياة.

يا ربّ، لعازر اللي بموتو الجسدي ٤ ايام مثّل البشرية الميتة كلّا، بيدعينا اليوم تا نوثق فيك انّنا معك ما منموت لا بل انت اللي بتحيينا.

تعا يا ربّ وشيلنا من موت هالعالم وساعدنا تا نعبر من هالحياة الفانية للحياة معك اللي ما بتشيخ وأبدية.
ونحنا كلنا ايمان فيك، يا ربّ، إنّك رح تحوّل موتنا لحياة.

تعا يا ربّ واسكب فينا حياتك ونجينا من ذاتنا الأرضية تا نربحك ونسبحك بالملكوت.

/الخوري يوسف بركات/