يسعد صباحك يا أجمل معلّم ومرشد وحبيب، ربّي يسوع.
شو حلو الوقت اللي بقضيه معك إنت وعم بتعلمني كيف حب وأغفر ، متل البيّ اللي بيعطي ذاتو مَتَل لولادو بالمحبة والمغفرة ومعرفة الله.
إنت البي والحبيب الصادق اللي ما بتعلّمني إلاّ الصدق وبتطلب مني إني كون شفاف وما شكّك الآخرين من خلال حياتي.
عم حاول أبعد عن كل شي بيأثر تأثير سلبي عالآخرين ويزرع فيهن الشك.
رح حاول إتقبّل الواقع والضعف اللي عندي وعند الآخرين تا أقدر أغفرْ لكل إنسان غلط معي.
عم حاول أترك بداخلي الطفولة البريئة، اللي كانت بقلبي وقت اللي خلقت، وما إتخلى عنها تا إبقى بقلبك يا ربّ.
بعرف إنك رح تغفرلي وتسامحني، يا ربّ، وتهيّئلي محل بملكوتك.
لهيك رح يكون هدفي إني حبّك بكل إنسان ائتمنتني عليه تا إزرع حبك بقلبو وأغفرلو من كل قلبي.
/الخوري يوسف بركات/
