صباح الأمل بأحد جديد، مشرق، مليان من نورك يا رب.
بهالأحد المبارك، بتدعيني، من خلال متل الفريسي والعشار، تا إرجع لذاتي وأعرف طريقة إرتباطي فيك وعلاقتي معك وصلاتي لإلك.
بهالأحد المبارك، عم بتنبّهني تا ما كون متل هالفريسي اللي شايف حالو عالعالم وما عندو شغلة إلا إتهام الناس بالخاطيين.
وياما إيام كتير بصير، بكلامي، لبّس الناس توب الخطية وأعمال الغلط.
بهالأحد المبارك، عم تدعيني تا إتمثّل بطريقة صلاة هالعشار اللي سلّم ذاتو بكلّيتو لرحمتك، ونسي ذاتو وكبرياءو. وياما إيام كتير بصير شوف بحالي عليك يا رب وبصير قولب الناس بخطيتي.
كلامك يا رب نور وحياة، ومن خلال هالنور رح إستنير فيك تا أقدر إعكسك للعالم.
/الخوري يوسف بركات/
