صباح النشاط والحيوية هوي صباحي معك يا ربّ.
بشوفك يا ربّ مع طلوع الفجر عم تدعيني تا اشتغل بكرمك.
بشوفك متابعني باول النهار بعدك عم تدعيني للشغل معك.
بشوفك ملاحقني بنص النهار تا كون عامل نشيط بأرضك.
وحتى بآخر النهار بتأملك ما بتملّ عم تدعيني للشغل بحقل الرسالة.
بس اوقات كتير يا رب، عم نكون من هالعمال اللي بيتذمرو منّك.
اوقات منوصفك بإنّك منّك عادل، ولازم تجازي عالارض الأشرار.
واوقات مننسى حالنا ومنصير نشوف عيوب الآخرين ومنصير نملّ من عدم المساواة عالأرض.
بس كمان، من ميلة تانية، بشوفك عم تدعينا تا نفوت بمنطقك، منطق المحبّة اللي بيغيّرلنا نظرتنا القاسية تجاهك وتجاه خينا الانسان تا نصير نمشي سوا درب القداسة.
/الخوري يوسف بركات/
